Mareykanka oo Israa’iil u diraya 200 oo askari oo la socda xabad joojinta Gaza

Ciidamada Mareykanka ee hore u joogay Bariga Dhexe ayaa la geyn doonaa Israel si ay ula socdaan xabad joojinta Gaza, sidaasina waxaa sheegay saraakii Mareykan ah.

Militeriga Mareykanka ayaa ka sameyn doono Israel guddi-hoowleed caalami ah kuwaas oo isku xiraya rayidka iyo militeriga. Waxaa suuragal ah in ay ku jiri doonaan sida ay sheegeen ciidamo ka socda wadamada Masar, Qatar, Turkey iyo iyo Imaaraatka Carabta.

Sarkaal sare ayaa sheegay in aysan ciidamo Mareykan ah gali doonin Gaza balse doorkoodu uu noqon doono in ay sameeyeen xarun isku xirta ciidamada kala duwan. Dowladda Israel way ogolaatay wajiga ugu horeeyay ee heshiiska Gaza ee Xamaas kaas oo keenay xabad joojin iyo in la sii daayo la haystayaasha iyo maxaabiista.

Howlgalka waxaa hoggaamin doona taliska dhexe ee ciidamada Mareykanka ee fadhigoodu yahay gobolka, ujeedkuna waxa uu yahay in ay la socdaan horumarka heshiiska xabadjoojinta iyo sidii gacan uga geysan lahaayeen isku xirka kaalmada bani’aadannimo.

Ciidamada ka socda dalalka kala duwan ayaa xaalada dhulka ka jirta ku wargelin doono Israel iyo Xamaas iyagoo u sii maraya Masar iyo Qatar. Sidoo kale waxay ku wargelinayaan hadii ay jirto xadgudub xabadjoojinta, sidaasina waxaa sheegay mid ka mid ah saraakiisha.

Qorshihii 20-ka qodob ka koobnaa ee madaxweyne Trump waxaa ku jiray in Mareykanka oo ay la shaqeynayaan dalalka Carabta iyo saaxiibada caalamiga in ay sameynayaan ciidamo xasilin oo kumeel gaar ah kuwaas oo degdeg lagu geynayo Gaza balse tani weli dhinacyada kuma heshiin, waxayna dhici kartaa marka la sii daayo la haystayaasha iyo maxaabisita.