Markab Xamuul Ah Oo Lagu Afduubay Meel U Dhow Soomaaliya

Markab nooca xamuulka qaada oo lagu magacaabo ‘MV LILA NORFOLK’ laga afduubtay meel u dhow xeebaha Soomaaliya.

Markabka ayaa waxaa saaran 22 Shaqaale la socdeen Markabka,  kuwaasi oo kala ah 17 Hindi ah iyo 5  Filibiin ah.

Afhayeenka Ciidanka Badda Hindiya oo Qoraal soo dhigay Barta X ayaa sheegay inay soo badbaadiyeen dhammaan Shaqaalihii la socday Markabka MV LILA NORFOLK ee habeen hore laga qafaashay meel ka baxsan Xeebaha Soomaaliya.

Afhayeenka sidoo kale waxa uu xaqiijiyey in ayna wax Budhcad-baddeed ah loogu tegin gudaha Markabka.

Markabka Dagaalka Hindiya ee INS Chennai ayaa la sheegay inuu taageero siiyey Markabka la qafaashay si Dib loogu kiciyo Matoorka Korantada ee Markabka iyo inuu Markabka sii wato safarkiisa.

Warar hore u soo baxay ayaa lagu sheegay inay ilaa 6 dabley hubaysan ay gudaha u galeen Markabkaasi, inkastoo markii dambe la sheegay inaan wax Budhcad-baddeed ah lagu arkin Dheega Markabka.