Dhakhtar Iyo Macalin Dugsi Qur’aan Oo Walaalo Ahaa Oo Loo Dilay Aano Qabiil

Wararka ka imaanaya gobolka Galgaduud ee Soomaaliya ayaa sheegaya in kooxo hubeysan ay Xalay ku dileen tuulada Ilix oo ka mid ah tuulooyinka hoostaga magaalada Dhuusamareeb ee Caasimadda Galmudug Macalin Dugsi Quraan iyo Walaalkiis oo dhakhtar ahaa.

Alle ha u naxariiste laba nin ee walaalaha ah ee dilka loo geystay ayaa lagu kala magacaabi jiray Macalin Liibaan Xasan Cismaan iyo Dr Axmed Xasan Cismaan, waxaana dilka kadib goobta si deg deg ah uga baxsaday maleeshiyaadka dilka geystay

Dilka Xalay loo geystay Macalinka Dugsi Quraan iyo Dhakhtarka la dhashay ayaa wararka soo baxaya waxay sheegayaan inuu salka ku haayo dilkooda aanooyin qabiil ah oo mudooyinkii la soo dhaafay ka taagana deegaano ka tirsan gobolka Galgaduud.

Dilka Dhakhtar Axmed Xasan Cismaan oo ahaa dhakhtar ka howlgali jiray magaalada Buuhoodle ayaa imaanaya, xili uu dhawaan dib ugu soo laabtay deegaankiisa Ilix oo la sheegay inuu ka sameeynayay adeeg Caafimaad.

Ciidamo ka tirsan kuwa ammaanka maamulka Galmudug oo ka kala baxay magaalooyinka Dhuusamareeb iyo Guriceel ayaa gaadhay goobta dilka uu ka dhacay, kuwaas oo raadinaya maleeshiyaadkii dilka geystay