Xamas ayaa sheegtay in ciidamadeeda ay gantaallada lidka taankiyada ku weerareen ciidamada duulaanka ah ee Israa’iil, xilli ra’iisul wasaaraha Yahuudda Benjamin Netanyahu uu ku gacan saydhay baaqyo ku saabsan in la hakiyo dagaalka Marinka Gaza.
Israa’iil ayaa ballaadhisay duullaanka dhulka ah ee ay ku qaaday Marinka Gaza, si ay uga aargudato weerarkii ay Xamas ku qaaday 7-dii October oo lagu dilay in ka badan 1400 oo israa’iiliyiin ah.
Goobjoogeyaal ayaa sheegay in ciidamada Israa’iil ay beegsadeen dhinaca koonfur waqooyi ee Gaza, balse ay iska cabin xooggan kala kulmeen dagaal-yahannada Xamas.
Guutada Al-Qassam, oo ah gabarbka millatari ee Xamas ayaa bayaan ay soo saareen ku sheegay inay isku dhaceen ciidamada duullaanka ah, aagga koonfureed ee Gaza, ayna la beegsadeen in ka badan 105 gantaallada lidka taankiyada ah.
Dagaal-yahanada ayaa sidoo kale laba taanki oo ciidamada Israel ay leeyihiin ku beegsaday waqooyiga Gaza, sida lagu sheegay bayaanka Al-Qassam.
Dhinaca kale, mas’uuliyiinta caafimaadka ee Gaza ayaa sheegay in tirada dhimashada shacabka ay duqeymaha ku dileen ciidamada Israa’iil ay gaadhay 8,306, oo ay ku jiraan 3,457 carruur ah.
Saraakiisha QM ayaa sidoo kale sheegay in in ka badan 1.4 milyan oo qof oo ka mid ah shacabka gaaraya 2.3 ee Gaza ay hadda yihiin hoy la’aan.
Khasaaraha dhimasho ee sii kordhaya ayaa qasbay in Mareykanka, oo ah xulufada koowaad ee Israa’iil, iyo dalal kale ay ku baaqaan in la hakiyo duullaanka, si loo ogolaado in gargaarka uu gaadho Gaza.
Si kastaba, Netanyahu ayaa Isniintii sheegay in Israa’iil ayna ogolaan doonin xabad-joojin ay la gasho Xamas, ayna sii wadi doonto duullaanka.
“Baaqyada ku saabsan xabad-joojinta waa baaqyo ah in Israa’iil ay isku dhiibto Xamas. Taasi ma dhici doonto,” ayuu yidhi Netanyahu.
Si kastaba, xeel-dheerayaasha millatari ayaa sheegaya in ciidamada Israa’iil ay si tartiib ah ku wadaan duullaanka dhulka ee ay ku qaadeen Gaza, taasi oo qeyb ka ah ayada oo Israa’iil ay eegeyso suurta-galnimada wada-xaajood lala galo Xamas oo gacanta ku haysa 239 oo Israa’iiliyiin ah.
