Dowladda Jabuuti Oo Dhul Ka Mid Ah Dalkaas Ka Iibisay Waddan Kale Iyo Sababta

(SLT-Jabuuti)-Saraakiisha dalka Koonfur Sudan ayaa xaqiijiyey in dowladda Jabuuti ay ka iibisay dhul ku yaalla xeebta dalkaas oo laga dhisayo dekad.

Koonfur Sudan waxay sheegtay in dekeddaas ay muhiim u noqon doonto dhoofinta saliidda caydhiin ee dalkaas, oo hadda la mariya dalka Sudan, iyo sidoo kale soo dhoofinta badeecadaha dalkaas oo badankood ka yimaada dekedda Mombasa ee Kenya.

Wasiirka shidaalka Koonfur Sudan Puot Kang Chol ayaa sheegay in dhulka ay ka iibsadeen Jabuuti loo adeegsan doono dhoofinta saliidda caydhin.

“Waxaan jeclaan lahaa inaan dhammaantiin idinku wargeliyo inaan muddo isku dayeynay inay waddooyin badan furano sababta oo ah Koonfur Sudan waa dal aan bad lahayn, sidaas darteed waxaa nalooga baahan yahay inaan u furnaano suuqyada,” ayuu yidhi.

Laba dal oo ku yaalla Dooxada Weyn ee Afrika oo kala ah; Uganda iyo Jamhuuriyadda Dimoqraadiga ah ee Congo ayaa dhowaan sheegay inay adeegyadooda dekedaha u wareejin doonaan Tanzania, taasi oo Rwanda iyo Burundi ka dhigeysa labada dal ee kaliya ee sida buuxda ugu tiirsan dekedda Mombasa.

Duncan Otieno, oo ah dhaqaalyahan fadhigiisu yahay Nairobi, ayaa sheegay in tallaabada Koonfur Sudan ay Kenya gelineyso xaalad adag, maadaama uu loolan adag kaga imanayo Dar es Salaam iyo Jabuuti.

“Waa inaan is weydiinaa, Uganda, Congo iyo hadda Koonfur Sudan waxa dhammaantood ku qasbay inay ka tagaan dekedda Mombasa,” ayuu yidhi.

Wasiirka dhaqaalaha Koonfur Sudan Abraham Mamer ayaa sheegay in dekedda Jabuuti ay marin qiimo jaban siin doonto alaabaha ay dhoofineyso iyo kuwa usoo degaya Koonfur Sudan.

Koonfur Sudan iyo Jabuuti ma wadaagaan xuduud, waxaana u dhaxeeya Itoobiya. Dekedda cusub ayaa waxaa Koonfur Sudan ku xidhi doono waddo dhex-mareysa Itoobiya