IRAN Oo Dayax-gacmeed Hawada U Dirtay

(SLT-Tehran)-Telefishanka qaranka Iran ayaa Axaddii shalay sheegay in Tehran ay hawada u dirtay gantaal, arrintaas oo keentay fal-celin ka timid Maraykanka. Arrintan ayaa imanaysa ka hor wadahadalada la filayo ee laga yeelanayo barnaamijka nuclearka ee Iran iyo quwadaha caalamka.

Ma cadda xiliga iyo goobta gantaalka laga ganay, hase yeeshee shaac-ka-rogidda ayaa timid ka dib markii satellite-ka laga arkay diyaar garow laga sameynayey xarunta dayax gacmeedyada Khomeini ee ku taalla dulleedka gobolka Semnan. Dhowr gantaal oo isla goobtan laga ganay ayaa hore u burburay.

Warbaahinta dawladda ayaa sii daysay sawirro muujinaya markii gantaalku dhulka ka baxayey. Arrintan ayaa imanaysa iyada oo xiisadda barnaamijka nuclearka ee Iran ay kor u sii kacayso.

Iran ayaa hore u sheegtay inay qorsheynayso tijaabooyin dheeraad ah oo la xidhiidha gantaalada dayax gacmeedka xambaara, kuwaas oo markii ugu horreysay ay dirtay bishii February ee sannadkii hore.