Raysal Wasaaraha Ingiriiska Boris Johnson Oo Ka Badbaaday In Xilka Laga Qaado

(SLT-London)-Raysal Wasaaraha Britain Boris Johnson ayaa ka badbaaday cod kalsooni ah oo ay u qaadeen xildhibaanada xisbigiisa Conservative-ka, hase yeeshee waxaa aad loo wiiqay awooddiisa ayaada oo tiro aad u badan ay diideen.

Natiijada codka loo qaaday Johnson ayaa noqotay 211-148, taasi oo uu ku qeexay “natiijo qayaxan oo lagu qanci karo.”

“Dowlad ahaan hore ayaan u socon karnaa oo diiradda saari karnaa arrimaha muhiimka ah,” ayuu weriyayaasha u sheegay.

Johnson oo 57 jir ah ayaa u baahnaa taageerada 180 xildhibaan si uu u badbaado — taasi oo ah aqlabiyadda 359-ka xildhibaan ee xisbigiisa ugu jira baarlamanka.

Guuldarro ku dhacda ayaa ka dhignaan laheyd inay soo geba-gebowdo hoggaankiisa xisbiga iyo xilka Raysal wasaaraha.

Waxaa hadda ay diiradda u wareegeysa haddii Johnson uu ka badbaadi karo inuu lumiyey kalsoonida tiro sidaas u badan oo ah xildhibaanadiisa iyo haddii wasiirro sare ay is-casili doonaan.

“Dowladda Conservative-ka waxay hadda rumeysan tahay in jebinta sharciga aysan caqabad ku aheyn sameynta sharciga,” waxaa sidaas yidhi Keir Starmer oo ah hoggaamiyaha xisbiga mucaaradka ee Labor-ka.

“Xisbiga Conservative-ka wuxuu hadda rumeysan yahay in shacabka Britain aysan xuquuq u laheyn inay fishaan siyaasiyiin daacad ah,” ayuu yidhi.

Codbixinta ayaa saaka oo salaasa ah qabsatay bogagga hore ee wargeysyada Britain, ayada Boris Johnson loogu yeedhay “nin dhintay oo socda.”