Cabdirashiid Riyo-raac Oo Shaaciyay Sababta Is-casilaadiisa.

(SLT-Hargeysa)-Guddoomiyihii hore Guddiga Doorashooyinka Somaliland ayaa ka hadlay sababta ka dambeysa inuu qaato go’aan ah inuu iska casilo komishanka Doorashooyinka, xili bilo yar ay ka hadhsan tahay waqtiga lagu ballamay in la qabto doorashada Madaxtooyadda.

Cabdirashiid Maxamuud Wacays (Riyo-raac) ayaa sheegay inuu isu casilay sabab la xidhiidha khilaafka daba dheeraaday ee ka dhex jira gudaha guddiga doorashooyinka Somaliland.

“Waxa sababay is casilaadda waxa ay ahayd khilaaf muddo dheer soo jiitamayay oo ka dhex jira Komishinka, mana jirto wax culeys ah ama cid culeys igu saartay in aan is casilo, sidaas awgeed aniga ayaa isku casilay” Ayuu yidhi Cabdirashiid (Riyo-raac).

Si kastaba, Doodda ka dhalatay Doorashada guud ee Somaliland oo ku asteesan 13ka November 2022 ayaa meel sare gaadhay, Xukuumadda ayaa u muuqata inay ka caga-jiideyso dardargelinta iyo diyaargarowga Doorashada halka Mucaaradka uu muddo korodhsi ku eedeeyay Madaxweyne Biixi.