FAALLO: Mee Madaxweynihii Mujaahidka Ahaa

Todobaadyo haddii la hillaadiyo aan ka yareyn 12-kii Asbuuc ee ina dhaafay, waxa Somaliland soo foodsaaray Ilahay si khayr qabta ha inooga samo-taxbixiyee,arrimo dhawr ah oo ay kamid yihiin, Abaaro,Sicir Barar,Xadhig,muraano sharci iyo kuwo dhul, arrimaahas oo marka si loo eeggo kuwo ku yimi qadarka Eebbe, balse haddana maamullada dunida ka jira iyagoo maanka ku haya mashkiladihii shalay lasoo dersay, waxay sameeystan ka hortag, ku talo gal, iyo Keyd,taas oo ay uga gol-leeyihiin inay ku yareeyan ama kaga badbaadan naf iyo maal wixii khasaare kasoo gaadhay, casharradii ay ka barteen mushkiladihii la soo dersay.

Hase-yeeshee nasiib darro Somaliland taasi kama jirto, waxaanad mooda in mushkiladaha Somaliland yihiin kuwo mar walba soo noqnoqda, isla markaana aanu jirin maamul keliya oo ay ka muuqato raadad iftiimiyana inuu maanka ku hayo in dalkan curdinka ahi, mushkiladaha ka koro oo uu horumar gaadho sida dunida ka dhacda.

Inkastoo marka dib loo milicsado taarikhda xukuumadihii hore iyo tan hadda joogta la odhan karo xoogaha horumar ah, balse haddana geesta kale marka la eego siiba sicir Bararka, muraanada dhulka, kuwa deegaanada, hadallada qaawan ee beelaha, shirarka aan sharciga waafaqsanayn, waxa la odhan karaa, xukuumadda maanta tallada haysaa ee uu hoggaamiyo Muuse Biixi, waa tii ugu liidatay Xukuumadihii Somaliland soo maray.

Teeda kale, marka arrimaha laga yimmaado waxa kaloo hadda dalka ka jira Abaaro baahsan oo saameeyey naf iyo maalba bulshada reer Somaliland, arrimahaas oo dhami iyadoo ay jiraan, ayaa haddana waxa muuqda ifafaale-yaal hor leh, kuwaas oo hadii aan laga hor tagin dalka gelin kara khalkhal iyo colaade sokeeye.

Mushkiladaha waxa kamid ah, muranka sharci ee ka dhex aloosan Xukuumadda Madaxweyne Biixi iyo Xisbiyadda mucaaradka ee la xidhiidha doorashada Madaxtooyadda, taas oo doonnaysa in ay soo qadinto doorashada ururrada siyaasada,halka ay damacsan tahay in ay dib u dhigto doorashada Madaxtooyadda oo hadda miiska saaran, isla markaana ka soo horaysa sharciyan ta ururrada,waxaanu khilaafkaas haddii aan hadda laga hor-tagin oo weliba Madaxweynaha Qaranku  Muuse Biixi aanu sharciga iyo dastuurka dalka ku soo noqon uu dalka u horseedi karraa jidkii burburka Somaliland.

Waxa kaloo,Madaxweyne Muuse Biixi la gudboon inuu Bulshada codkiisa maqashiiyo, kana hadlo duruufaha hadda taagan, ee xalka u baahan sida ,taakulanta dadka abaaruhu ku habsadeen iyo wax ka qabashada Sicir Bararka xadhka goostay iyo inuu soo afjaro khilaafka uu isagu curiyey ee u dhaxeeya  isaga iyo mucaaradka,Kuwaas oo haddii aanu madaxweynuhu furdaamin wax u dhimi kara, taarikhda iyo magacii uu kaga tagi lahaa Qaranka madaxweyne  Muuse Biixi ,sida darteed  madaxweyne waxa haboon inaad shacabkaaga la hadasho mushkiladaha taagan wixii awoodaada ah xal u raadiso.

Wargeyska Waaberi