Dowladda Iiraan Oo Soo Dhaweysay In Wadahadal Lagu Dhammeeyo Khilaafka U Dhaxeeya Sacuudiga

(SLT-Iran)-Afhayeenka Baarlamaanka Iiraan ayaa sheegay in Tehraan ay soo dhaweyneyso wadahadal ay la bilowdo wadanka ay ku xafiiltamayaan gobolka ee Sacuudiga.

Mr Cali Larjani ayaa wareysi uu ku siiyay tv-ga caalamiga ah ee Al-Jaziira magaalada Tehraan ayuu ku sheegay in Iiraan diyaar ay u tahay wadahadal in lagu dhammeeyo xiisadda u dhaxeysa labada Waddan.

Hadalkaan ayaa imaanaya maalmo kadib markii tv-ga CBS ee dalka Mareykanka uu u sheegay dhaxal sugaha Sacuudiga in dalkiisa u daneynayo in xal nabadeed uu la gaaro Iiraan.

Mr Salmaan ayaa tilmaamay in uu ka soo horjeedo in labada dal qilaafka u dhaxeeyo uu isku badalo dagaal Milatari.

Gudoomiyaha Baarlamaanka Iiraan ayaa ugu dambeyn sheegay in wadahadalka Sacuudiga iyo dalkiisa ay xalin doonto dhibaato badan oo ka taagan Gobolka.