Dalalka Yurub Oo Ka Digay Ololaha Maraykanka La Damacsan Yahay IRAN

(SLT-Brussels)-Hoggaamiyayaasha dalalka Midowga Yurub ayaa ugu baaqay Maraykanka inuu ka shaqeeyo xasiloonida bariga dhexe, xili uu xoghayaha arrimaha dibada ee Maraykanka Mike Pompeo uu safar kadis ah ku yimid magaalada Brussels.

Mike Pompeo ayaa kulamo uu la yeeshay hogaamiyayaasha EU-da uga hadlay waxa uu ugu yeeray “khatarta & Halista” kasoo socota wadanka IRAN.

Ms. Federica Mogherini oo ah haweenayda EU-da u qaabilsan siyaasada arrimaha dibada ayaa ugu baaqday Maraykanka inuu is-xakameeyo isla markaana ka shaqeeyo sidii wadahadal loogu dhameyn lahaa wixii khilaaf ah oo jira.

Maraykanka iyo EU-da ayaa si weyn ugu kala fogaaday siyaasada ku aadan dalka Iran, waxayna Midowga Yurub sheegeen inay weli taageersan yihiin heshiiskii caalamiga ahaa ee dalka Iran wax ka saxiixay sanadkii 2015, kaasi oo lagu xakameeyey barnaamijkii Nukliyeerka ee Tehran, walow uu Donald Trump Madaxweynaha Maraykanka sheegay inuu ka baxay heshiiskaasi.

Xulafada Maraykanka oo ay ku jiraan Israel, Sacuudiga iyo Imaaraatiga ayaa olole weyn ugu jiray in la burburiyo heshiiskii 2015 iyo waliba in duulaan militari lagu qaado dalka Iran oo ay ku eedeeyeen inuu khatar ku yahay amnigooda.

Sacuudiga iyo Imaaraatiga ayaa maalmihii lasoo dhaafay bilaabay inay faafiyaan wararka sheegaya in qaar kamid ah Maraakiibtooda shidaalka weeraro lagu qaaday, xili Maraykanka uu sheegay inuu la socdo qorshe Iran dooneyso inay ku weerarto dalalka jaarka la ah ee Khaliijka iyo saldhigyada uu Maraykanka ku leeyahay dalalkaasi.