Wasiirka Arrimaha Dibadda Eritrea Iyo La-Taliyaha Madaxweynaha Eritrea Oo Gaadhay Magaalada Muqdisho Oo Dhawaan Booqasho Ku Yimid Somaliland

(SLT-Muqdisho)-Wasiirka Arrimaha Dibadda Eritrea Cusmaan Saalax iyo La-taliyaha Madaxweynaha Eritrea Yemane Gabreab ayaa goor dhow gaadhay magaalada Muqdisho ee Caasimadda Soomaaliya.

Socdaalkan oo ahaa mid aan horay loo sii shaacin ayaa noqonaya kii saddexaad oo Wasiirka Arrimaha Dibadda Eritrea ku tago Muqdisho.

Wafdiga waxaa Garoonka Diyaaradaha Aadan Cadde kusoo dhaweeyay Wasiirka Arrimaha Dibadda iyo Iskaashiga Caalamiga ah Soomaaliya Axmed Ciise Cawad iyo Mas’uuliyiin kale.

Wararka ayaa sheegaya in wafdiga Wasiirka Arrimaha Dibadda Eritrea loo galbiyay Madaxtooyada Villa Soomaaliya, halkaasoo wada hadalo kula leeyihiin Madaxda dowladda Soomaaliya.

Bishii la soo dhaafay ayay aheyd markii Wasiirka Arrimaha Dibadda Eritrea iyo La Taliyaha Madaxweynaha Eritrea ay booqasho labo cisho ku tageen magaalada Hargeysa ee caasimaadka dalka Somaliland, halkaasoo si weyn loogu soo dhoweeyay.