Taliyaha NISA Oo Xalay Baydhabo Kula Kulmay Sheekh Mukhtar Robow

(SLT-Baydhabo)-Safar aan la sii qorsheyn ayuu taliyaha ciidanka Nabadsuggida iyo Sirdoonka qaranka Soomaaliya Xuseen Cismaan Xuseen shalay ku tagay magaalada Baydhabo ee xarunta kumeel gaarka Koonfur galbeed.

Markii uu gaadhay baydhabo waxaa kusoo dhaweeyay mas’uuliyiin ka tirsan maamulka Koonfur Galbeed Soomaaliya, xildhibaano iyo xubno kale ,waxaana taliyaha iyo wefdigiisa ay xalay ku hoyanayaan magaalada Baydhabo ee xarunta gobolka Baay.

Inkastoo ujeedka safarka taliyaha Nabadsugida Soomaaliya aan la ogeyn balse warar soo baxaya waxa ay sheegayaan in halkaasi uu u tagay sidii uu kulan ula qaadan lahaa Mukhtaar Roobow Abuu Mansuur kaasoo dhawaan ay dowlada federaalka Soomaaliya kasoo horjeesatay musharaxnimadiisa maamulka Koonfur Galbeed.

Wararkii ugudambeeyay ee laga helayo xalay magaalada Baydhabo waxa ay sheegayaan in taliyaha nabadsugia iyo sirdoonka Soomaaliya Xuseen Cismaan Xuseen iyo xubnaha ku wehliya safarkiisa ay kulamo halkaasi kula leeyihiin odayaasha dhaqanka ee kasoo jeeda Koonfur galbeed iyo weliba musharaxa ku adkeysanaya musharaxnimadiisa Mukhtaar Roobow Abuu Mansuur kaasoo isla maantaba shiriyay odayaasha dhaqanka iyo waxgaradka maamulka Koonfur galbeed oo uu kala hadlay damaciisa ku aadan doorashada madaxweynenimo ee Koonfur galbeed.