Farmaajo Oo Safar Ku Tagay Addis-ababa, Madaxweynaha Soomaalida Itoobiya Oo Soo Dhawayntiisa Ka Qayb Qaatay+SAWIRRO

(SLT-Addis-ababa) Madaxweynaha Ismaamulka Soomaalida Itoobiya Mustafa Maxamed Cumar (Cagjar) ayaa maanta ku soo dhaweeyay garoonka diyaaradaha Bole ee magaalada Addis Ababa Madaxweynaha  Dalkaasi  Soomaaliya iyo wafdi uu hoggaaminayay.

Soo dhoweyntan oo aheyd mid heerkeedu sareysay ayaa waxaa ka qeyb qaatay Guddoomiyaha Xisbiga Dimoqraadiga Shacabka Soomaalida iyo Mas’uuliyiin ka tirsan dawladda Itoobiya.

Madaxweyne Farmaajo iyo Madaxweynaha Somali State Mustafa Cagjar ayaa wada hadlay arrimaha ammaanka, horumarada iyo dadaalada nabadda ee ka socda Geeska Afrika.

Sidoo kale waxaa laga wada hadlay sidii loo dardar gelin lahaa dadaalada nabadda iyo is bedelka ka socda Deegaanka Soomaalida.

Madaxweyne Farmaajo ayaa u tagay Addis Ababa ka qeyb galka shir madaxeedka Urur Goboleedka IGAD oo lagu wado in looga hadlo arrimo ay ka mid yihiin is bedelka Geeska afrika iyo dib uga mid noqoshada ururka ee dowladda Eritrea.