Xiisaad Ka Dhalatay Tageerayaal Kubadda Cagta Ah Oo Ammaanay Saddam Xuseen

(SLT-Ciraaq)-Wasaaradda arrimaha dibadda Ciraaq ayaa u yeertay safiirka dalka Algeria ee u fadhiyo magaalada Baqdaad kaddib markii taageerayaasha kubadda cagta Algeria ay qaadeen hal ku dhigyo ay ku ammaanayeen madaxweynihii hore ee Ciraaq Saddam Xuseen.

Kooxdii ka socotay dalka Algeria iyo kooxdii ka socotay Ciraaq ayaa kubad ku wada dheelayay garoon ku yaalla magaalada caasimadda ee Algiers.

Tageerayaasha kooxdii Algeria ayaa la arkayay iyagoo ku dhawaaqaya “Allahu Akbar, Saddaam Xuseen”

Kooxda ciidammada cirka ee Ciraaq ee cayaarta ka qayb galaysay ayaa daqiiqaddii 75-aad ka baxay garoonka iyagoo ka careysan tallaabada ay ku dhaqaaqeen tageerayaasha.

Xiriirka kubadda cagta ee Ciraaq ayaa ku hanjabay in xulkooda ay ka saarayaan tartanka inta hartay islamarkaasna ay kasoo horjeedaan waxa ay ugu yeereen “Hal ku dhigyada lagu taageeraya mintiddiinta iyo diktatooriyadda.

Afahayeenka wasaaradda arrimaha dibadda Ciraaq Axmed Maxjuub ayaa cambaareeyay hal ku dhigyada ay tageeraayaasha kubadda cagta Algeria ay u jeediyeen Saddam Xuseen.

Madaxweynaha xiriirka kubadda cagta Ciraaq Cabdul khaaliq Mascuud ayaa ku hanjabay inuu iscasilaya waa haddii aanan tallaabo laga qaadin tageerayaasha Algeria.