Askari Ka Tirsan Ciidanka Booliska Soomaaliya Oo Lagu Dhex Dilay Masaajid Ku Yaalla Magaalada Muqdisho

(SLT-Muqdisho)-Askari ka tirsan ciidanka Booliska ayaa xalay fiidkii lagu dhex dilay masaajid ku yaalla degmada Xamar Jajab ee magaalada Muqdisho.

Sida wararku sheegayaan askariga ayaa la dilay, xilli uu u taagnaa rakacadii u dambeysay ee Salaadii Cishaha.

Dad goobjoogayaal ayaa u sheegay Idaacada Risaala in askariga laga toogtay dhabarka dambe, waxaana ninkii dilka geystay ka baxsaday goobta, isagoo horay u qaatay qori uu watay askariga.

Wararka ayaa intaa ku daraya in rasaasta markii gudaha masaajidka laga maqlay ay argagax ku riday jameecadii Masaajidka oo qaarkood kala cararay.

Dhacdadan ayaa ka mid ah dhacdooyinka fara ku tiriska ee ka dhaca dalka Soomaaliya, iyadoo horay dad kala duwan masaajid dhexdiisa lagu dilay, halka dadka kalena la gaado marka ay masaajidka ka soo baxaan.