“Khilaaf U Dhaxeeya Maxamuud Xaashi Iyo Wasiir Xirsi Ma Jiro Mana Ogi”. Boqor Buur-madow.

(SLT-Hargaysa)-   Boqor Cismaan Aw Maxamuud Muxumed Buur Madaw oo kamida madaxdhaqameedka ugu miisaanka culus   Madax dhaqameedka Somaliland  ayaa kahadlay  meeshana ka saaray  in  Xurguf siyaasadeed  iyo khilaaf cakirani dhex taalo wasiirka Madxtooyada Md: Xirsi Cali Xaji Xasan & Wasiirka Duulista Maxamuud Xaashi, waxanu sheegay inay u siman yihiin labadaasi masuul.

buurmadow

Boqor Buurmadaw oo maanta saxaafada kula hadlayay magalada hargaysa ayaa yidhi “Labada nin ba Oday baan u ahay, odayga(Madaxweynaha) ayay la shaqeeyaan, Odayga ayay gacan yarihiisa yihiin, afka beesha midkoodna kuma hadlo, afka beesha dhaqanka oo anaga ah baa ku hadalna, wax khilaaf ah labadooda dhex yaalana anigu ma ogi, loolan madaxweynaha ay la shaqeeyaan ay loolamayaana ma ogi,” ayuu yidhi Boqor Buudmadow.
Waxa uu sidoo kale sheegay in haddii loolankaasi jiray aanay u kala eexan doonin balse ay sixi doonaan “Haddii maanta iyaga dhib ka dhex jirtana, labaduba waa innamadayadii umana kala hiilin karno, anagayna noo taal inaanu saxno, mana ogi hadda wax khilaaf ah oo iyaga dhex yaala,” ayuu yidhi Boqorku.
Sidoo kale  Boqor Buurmadow, ayaa ku dooday inuu rumaysan yahay in hogaanka dhaqanku dalka hogaamiyo “Anigu waxaan qabaa in madaxda dhaqanku ugu haboon tahay inay dalka hogaamiso. Waxaanu qabnaa inaanu nahay rag dalka hore u hogaamin jiray oo ingiriis wax la qortay oo la inqilaabay oo innamo yaryar oo siyaasiyiin ah oo aan waxba wadi Karin inqilaabeen”, ayuu yidhi Boqorku.
Isagoo sii hadlaya waxa uu sheegay in madaxda dhaqanku yihiin kuwa ruuxiga ah ee bulshadu ixtiraamto”Waxaanu qabnaa inaanu nahay hogaanka ruuxiga ah ee talada wax ku leh ee bulshadu ixtiraamto laakiin, hadalka odhanaya siyaasadda ma soo gali karaan waa afka siyaasiga. Caalamkii wuu ilbaxay, dadkayagii waxay joogaan shanta qaaradood ee aduunka, geedkii miyiga ku hadhi maynee dadkayga ayaanu daba soconaa, teknoolajiyadda ayaanu la soconaa, horumarka ayaanu la soconaa,”ayuu yidhi Boqor Buurmadow.

Abokor Cigaal

Somalilandtoday/Hargaysa/Office

Contact@Somalialndtoday