Somaliland Oo Si Debecsan Uga Hadashay Maamulka Hawada Ee Muqdisho Lagu Wareejiyay Iyo Booqashada Gobolka Sanaag Uu Ku Tagay Wasiir Xukuumadda Farmaajo Ka Tirsan.

(SLT-Hargaysa) Xukuumada Somaliland ayaa si debecsan oo aan adkayn uga hadashay  fara gelinta ay Dawladda  Dalkaasi Soomaaliya  ku samaysay xuduuda bariga Jamhuuriyadda Somaliland  gaar ahaan degmada Badhan ee gobolka Sanaag.


Shirkii golaha wasiirada somaliland ee maanta qabsoomay oo lagu soo qaaday safarkii wasiirka qorshaynta dawlada soomaaliya ku yimid degmada Badhan ee gobolka Sanaag ayaa lagu sheegay in talaabaadaaasi ay dawlada somaliland u aragto gardaro cad oo kaga imanaysa xukuumada Muqdisho.

War murtiyeed ka soo baxay Shirkii golaha wasiirada dawlada somaliland ayaa qodobka koowaad lagu sheegay aragtida ay somaliland ka qabto safarkii wasiirkii qorshaynta soomaaliya ee Badhan,waxaanu qodobkaasi u dhignaa sidan .

“In Dawladda Somaliland ay gardaro cad u aragto faro-gelinta ay Soomaaliya ku samaysay hawada Somaliland, sidoo kalena ay qaar ka mid ah maamulkeedu soo galaan xuduudaha Somaliland, taasina maaha mid ay Somaliland u dulqaadan doonto wixii hadda ka danbeeya.”.

Somalilandtoday/Hargaysa/Office