Everton Oo Dhulka Jiiday Arsenal Ciyaar Ka Tirsan Horyaalka Ingiriiska

(SLT-Liverpool)Kooxda Everton ayaa guuldaro xanuun badan dhabarka usoo saartay dhigeeda Arsenal kulan ka qabsoomay Goodison Park oo uu go’aamiyay kabtanka Everton ee Phil Jageilka oo goolka lagu kala baxay dhaliyay daqiiqadii 10-aad.

Guuldaradan ayaa ah mid dib u dhigaysa hammigii Arsenal ee kaalmaha sarre walow ay wali kusii jiri doonaan kala sarreynta booskeeda afraad hadana waxa ay waayi karaan kaalintaas haddii ay habeen dambe Chelsea guul ka gaadho West Ham United.

Shaxaha Labada Kooxood Ee Kulanka
Everton

Arsenal: Leno, Sokratis, Elneny, Monreal, Mustafi, Mkhitaryan, Ozil, Maitland-Niles, Kolasinac, Guendouzi, Lacazette.

Keydka: Cech, Leichtesteiner, Jenkinson, Ramsey, Iwobi, Suarez, Aubameyang.

Falanqaynta Kulanka

Kulanka ayaa ku bilawday qaab ay labada kooxood wada ciyaarayeen kubad weerar iyo weerar celis ah isla markaana ay si siman isku dhaafsanayeen halista.

GOOAL: Goolka furitaanka ee kulanka ayaan noqon mid la raagsaday waxaana daqiiqadii 10-aad shabaqa gaadhay kabtan Jagielka oo kulankan kusoo bilawday, Jageilka ayaa si fudud ku helay kubadda oo goolka hortaala kaddib markii daafacyada Arsenal ay celiyeen darbadii Calvert-Lewin.

Markale Everton ayaa ku dhawaatay inay goolka labaad ee kulanka la timaado, Gomes ayaa laag xoogan ka tuuray meel ka baxsan xerada ganaaxa balse darbadiisa ayaa hareer martay goolka.

Daqiiqadii 38-aad ee kulanka ayay soo xaadirtay fursadii saddexaad ee ciyaartu ahna isla fursadii saddexaad ee Everton kaddib markii Sigurdsson uu si toos ah darbad ugu aadiyay shabaqa Gunners balse goolhaye Leno ayaa markiisa badbaadin sameeyay.

Qaybta hore ayaa kusoo dhammaatay 1-0 ay hoggaanka ku haysatay Everton, Qaybtaas ayaa ahayd mid aysan haba yaratee wax fursad ah helin Arsenal isla markaana ay awoodi waayeen inay xataa hal darbad tuuraan.

Qaybtii dambe ee kulanka ayay Arsenal lasoo laabatay tamar intii hore ka badan, Ramsey oo bedel ku yimid ayaa karoos ka helay Aubameyang oo qudhiisu bedel ahaa balse kubadda oo uu madax ku hirdiyay dhaafin waayay goolhaye Pickford.

Lacazette ayaa markale ku dhawaaday inuu goolka kasoo celiyo kooxdiisa balse weeraryahanka ree France ayaa awoodi waayay inuu xoojiyo kubadda oo uu madaxeeyay daqiiqadii 59-aad.

CAJIIB: Toffees ayaa ku dhawaaday inay rajada kulanka ee Gunners yareeyaan waxaana goolka si toos ah u wajahay Calver-Lewin oo baas ka helay Digne, Goolhaye Leno oo ahaa halyeeyga kulanka ee Arsenal ayaa halistaas ka badbaadiyay kooxdiisa isaga oo xakameeyay darbadii Calvert-Lewin.

Markale Everton oo ahayd kooxda fursadaha kulanka gacantaku haysay ayaa heshay fursad kale oo dahabi ah waxaana goolka si furan kubadda ugula baxay Bernard isaga oo xiddiga ree Brazil meel gees ah kubadda kasoo laagay ayuu lugta ku badbaadiyay kubadda Leno.

Ugu dambayn, Kulanka ayaa kusoo dhammaaday guuldarro dib u dhac ah oo dhabarka loo saaray kooxda Arsenal waxaana ay sii fadhiyi doonaan booska afraad ee kala sarreynta walow ay habeen dambe Chelsea u waayi karaan.